Indoe se andasea a fare la spesa, artigiani  e svaghi  de tresenta

Capiso che i tempi i cambia, ma chi, zinquat’anni fa a pensava chi i cambiasse a sto modo!

A me ricordo che me mama la partea con la sporta piena de ovi, e me par da sentire la ose de me opà cal ghe disea “Stà atenta ca ne te caschi, seto che frità ca te fè”.

Saio cosa cla andasea a fare? La spesa dal magnare in botega, allora a se disea cusì. E indoe se catava sta roba? Al pan da Azzolini, Rigonali e Pacin alle Cavale.  In centro da Gino Marini e so muiere, la Ghita, sostituio nella gestione da Renato Mantoan. Dalle sorelle Lorenzoni o dalla Gnese. A Santa Ciara da Rusghin. Al palazon da Carlin (prima ca nascese la Copeeativa). In Barguarina da Rino Bottegaro. Al gorgo dla sposa da Picio Ranaro. A Pasetto da Bombonato, a se catava i generi da magnare.

Sa te volevi la verdura a tla catavi dalla Maria Martelo, dalla Pieretta all’Ospedale e da Gaitan Ugnela sotto le fu scuole Medie (fu parche i ia fate morire con la salute), alla calà dal Strazarin dalla Lucia Frari, inveze so marì al laorava da falegname. Vizin alla Cesa, dall’Alvira (quante carote e sugurizia co magna).

Più tardi da Bepe Scarazzato alla pesa, da Angelin alle scalinà. E par finire, da quella ca andsea par le strade, la Pescina col la so musa e il caretin.

I cioldi e le vide le se catava da Romolo moletta detto anche “Co digo, digo, no posso, no posso”. E da Piteo, lì indoe che adesso a ghe le poste. Le scarpe da Romano Stlin o da Gioanin Valin. A giustarle, oltre che i du negozianti, a ghiera la bottega da scarparo da Onelio Sita.

La carne in becaria da Mario Stopazzola, sostituio da Mariolin Tocchio. Solo dopo, carne bovina e de cavallo, da Piero Babi. I gelati e le marene dal Piave e dalla Isola Gaglian davanti la Cesa.

Solo le medicine no le se catava in bottega, ma in Farmacia, da Sartorelli e da Migliari (ne me ricordo chi prima e chi dopo). La seconda farmacia è stata verta dopo la guerra, dal Dott. Columbis.

Par bevare un’ombra de vin tornen in centro: dalla Zole alla pesa, in piazza da Ciucia Fiori e da Alonzio. Da Carlin al palazon, alla Nave e da Castlan al ponte. Al gorgo dla sposa da Zorzon, in Barguarina da Vernuci.

Se questi i iera i capitei di puareti, disime come se podea ciamare al chiosco de Piero Maniezo. I so clienti i disea che na bala de vin la costava tanto a ciaparla,  ma dopo con qualche biccere se podea tegnerla viva par na stemana.

I siori al caffè i lo andasea a sorseggiare al Bar Centrale, da Pirani. Da Nino Bertolani, sostituio da Sergio Barbini, Piero Perusin, dalla Celsa e infine da Dante Ghiotti.

Al late a tlo catavi da Gusto Modena, dai fradei Dalla Pozza e da Albino Magnan, che i lo portava anche par le case. Caso strano i stasea tutti alle Cavale e spesso quando i se robava i clienti i se baruffava e i sle dasea de santa ragion.

Le robe par cusire a tle catavi da Renzo Romani in tal canton dla Cesa, detto “Mugnagna”o dalla Metilde vezin al teatro. Le stofe in te na roba più granda, al Bottegon dai Romani e i vestiti da Argante Cristo e più tardi da Renzo Bianchini.

Da Richetto Bolugnin a te catavi: piatti, scudele, pegnate, de tutto compreso al fumare.

L’artigianato in tal nostro paese le cuasi scomparso. Te ricordito? Gustavin al vendea e al giustava le biciclette e i motorin, come Guido Mesciaro, Gioani Pegorari, Ettore Draghi, Gino Bacalini, cal fasea un poco de tutto, Ristodemo Pulga invece d’inverno al ghea sempre in piè le sgalmare par stare caldo.

Le biceclete le se porta al stalo dalla Lina Moretta e dalla Teresa de Anzolin, all’Ospesdale, dalla Santa, dalla Zaira e dalla Mesciara al zimitero.

I frari, Eugenio, Toni, e Piero Pogi, iera sempre in via baruffare (bona zente, sa voto, iera fati cusì). Nantro fraro al iera Tachinon che prima al fasea le cortline e falzun. E pò, al li andasea a vendare davanti al teatro.

Michelin Benati al stagnava le pegnate e le tege de rame. I tal canton dle Poste, tutte le domeneghe a te catavi al moleta. Lu al cantava sempre: “al mistiere dal moleta le un mestiere ca consola, menando la gambetta al fa girar la mola”.

Alvise Quaio, a me par da vedarlo in tla so bottega infumegà. I cavai i se ferava da Gigeto Ganzerla e i se vestia da Arturu al selaro, i cavai ie sparì, a ghe restà solo i musi.

Sa te volevi infarinarte a te andasei al mulin da Crivelenti e da Azzolini. Ghiotti Gioani al vendea legna e bombole. Le porte e le finestre a le fasea Gioani Pasqualin, Gusto Fugagnoli e Guglielmo Stlin.

Ermete Fortunin che oltre a fare al falegname al vendea anca i capoti senza maneghe.

La pompa dl’acqua a tla giustava prima Beri e dopo Wilmo Violo con le so manone. A se disea che: “invidava le vide con la ciave e al le registrava con le man”.

Il contadin, al concime e le somemze, al le comprava al Consorzio Agrario e all’Unione Agricola. Par machinare e po arare la terra indasea da Curilo e Bortolo Pistarolo, dai fradei Bombonato e Beri. 

A comprare gli arloi bisognava andare da Bruno Ghirlanda o da Angelo Brunelo. Aradi e dopo le television a ti compravi da Guiari e da Bortolin Beri. (a me son sempre domandà parchè i lo ciamasse Bortolin, cal iera grande e grosso). 

I vestiti sul to doso a ti fasea Pasquin, Burato,  Griseto e Lanzon alla pesa. Dle sarte a me ricordo l’Elena Ghirlanda, la Ersiglia Bendin, la Ema Draghi e le sorele Bertazza. Ame dismentegava la Zomeide, cla ne parlava mai “poco”.

I caveii, le done le si taiava lore in casa, solo in poche, sle ghea i schei, le andasea dalle sorelle Cecè. Ai omeni e i potleti a ghi taiava so mama con la scudela. Solo in pochi i andasea a taiarsli da Danesi e da Salan e in Barguarina da Validio Capisi, chi iera più quei cal cavava che quei cal taiava. Ormai a son vecio e me scuso sa me son dismenteghà qualcuno. Inveze par al svago, a se andasea al teatro vecio, cal iera cusì belo.  Varda che roba! Anca se vecio a se podea vedare qualche operetta, i fasea feste da ballo, a se scoltava conferenze e dibattiti. Adesso cle novo a bala solo i ponteghi e le sceneggiate le sa spostà in Comune.

Dla me età, chi ca ne andà al cinema, anca fando la fila par entrare, dalla Cortelazzo o da Bendini? Solo quei chi iera senza schei. Quei indasea al cinema da Bendini con la testa sui cuscini (a leto).

Al belo a iera che le copiete in loia le fasea de tutto manco che vardare il film.

A me dismentegava i bei pomeriggi dla domenega ca se pasava al campo sportivo, quando a se vedea la squadra dal Tresenta cla zugava al balon. No come adesso chi fa i divi, quando che i ne se spacca le gambe con cattiveria.

Quanta nostalgia per le ore passate all’oratorio, induele andà a finire? Non solo l’0ratorio è spario, ma al novanta par zento dle botteghe de quaranta anni fa, che adesso ie sta sostuie da na botega più grande chi i la ciamà con na parola inglese “SUPERMARKET”. Se questo le al progresso a mi me scapa da pianzare.